बेनी
पुस ११
चिनियाँ कम्युनिष्ट पार्टीको चार सदस्यीय उच्चस्तरीय टोली भोलि नेपाल आउने भएको छ । नेपालमा सत्तारुढ नेपाल कम्युनिष्ट पार्टी विभाजनको बाटोमा लागेका बेला उत्तरी छिमेकी चीनको टोली नेपाल आउन लागेको हो ।
भारतीय दैनिक पत्रिका हिन्दुस्तान टाइम्सले चिनियाँ राष्ट्रपतिको आदेशमा चार सदस्यीय कम्युनिष्ट नेताहरुको टोली काठमाडौँ आउन लागेको बताए पनि यसको पुष्टि भएको छैन ।
चिनियाँ कम्युनिष्ट पार्टी अन्तर्राष्ट्रिय विभाग उपमन्त्री कुओ येचौको नेतृत्वमा पार्टी अन्तर्राष्ट्रिय विभाग महानिर्देशक छुइ यानसहितको चार सदस्यीय टोली काठमाडौँ आउन लागेको बताइएको छ ।
नेपालका लागि चिनियाँ राजदूत होउ याङ्छीले नेकपाको दुबै खेमाका उच्च तहका नेताहरुसँग भेटेर चिनियाँ प्रतिनिधि मण्डलसँगको भेटका लागि समय मिलाइसकेको बताइन्छ ।
नेपालमा सत्तारुढ दल विभाजन उन्मुख हुँदा खासगरी भारतीय पत्रिका र केही अमेरिकी पत्रिकामा समेत ‘चीनले सेटब्याक खाएको’ भन्ने आशयका सामग्री आएका थिए ।
नेपालमा दुईतिहाई मतसहितको कम्युनिष्ट पार्टीको बलियो सरकार रहेका बेला गत वर्ष चिनियाँ राष्ट्रपति सि जिनपिङले नेपालको राजकीय भ्रमण गरेका थिए ।
स्रोतका अनुसार उच्चस्तरीय टोलीले नेपालमा चार दिन बिताउनेछ ।