बेनी
माघ १३
पाकिस्तानस्थित विश्वको दोस्रो सर्वोच्च शिखर ‘माउन्ट केटु’को कीर्तिमानी सफल आरोहीहरूलाई प्रधानमन्त्री केपी शर्मा ओलीले सम्मान गरेका छन् । सोमबार प्रधानमन्त्री निवास बालुवाटारमा आयोजित एक कार्यक्रममा प्रधानमन्त्रीले आरोहीहरूलाई दोसल्ला र प्रमाण पत्रद्वारा सम्मान गरेका हुन् ।
कार्यक्रममा प्रधानमन्त्री ओलीले हिउँदे सिजनमा माउन्ट केटुको सफल आरोहण गरेर विश्वसामु नेपालको चिनारी र पहिचानलाई थप उँचो बनाउने काम प्रशंसनीय भएको विचार व्यक्त गरेका थिए ।
हिमाल आरोहण जो सुकैले गर्न नसक्ने भन्दै प्रधानमन्त्री ओलीले सफल हिमाल आरोहीहरुका लागि विशेष मानपदवी र विभूषणको व्यवस्था गरिने जानकारी गराएका थिए ।
संसारकै दोस्रो सर्वोच्च शिखर केटू आरोहण गरेर फर्किएको नेपाली टोली स्वदेश फर्किँदा सोमबार उनीहरुलाई त्रिभुवन अन्तर्राष्ट्रिय विमानस्थलमा भव्य स्वागत गरिएको थियो । नेपाल पर्यटन बोर्डको अगुवाइमा पर्वतारोही संघसंस्था र शेर्पा समुदायले बाजागाजा र झाँकीसहित आरोहीहरुको स्वागत गरेका हुन् ।
दश सदस्यीय नेपाली पर्वतारोहण दलले गत शनिबार हिउँदे याममा २८,२५१ फिट अग्लो माउन्ट केटु चढेर इतिहास रचेको थियो ।
टोलीको नेतृत्व गरेका निर्मल पुर्जाले माउन्ट केटूमाथिको विजय जलवायु परिवर्तन र महामारीविरुद्ध बलियो सन्देश भएको विचार व्यक्त गरे ।
म्याग्दीको अन्नपूर्ण गाउँपालिका–३, दानाका पुर्जाले यसअघि संसारभरका अग्ला हिमाल आरोहण गरेको विश्व रेकर्ड कायम गरिसकेका छन् ।