बेनी
फागुन १२
सत्तारुढ नेकपाको माधव–प्रचण्ड पक्षधर केन्द्रीय सदस्य तथा विदेश विभाग उप–प्रमुख विष्णु रिजालले पछिल्ला राजनीतिक तिक्तता बिर्सेर पुरानै नेकपाको एकताको पक्षमा उभिन नेता कार्यकर्तालाई अनुरोध गरेका छन् ।
आज बिहानै सामाजिक सञ्जाल फेसबुकमार्फत् आफ्नो धारणा सार्वजनिक गर्दै रिजालले यस्तो अनुरोध गरेका हुन् । घटनाक्रमबाट पाठ सिक्दै सबै नेताले आ–आफ्ना सीमा र सबलता बुझ्न सकियो भने नेकपा पुनः एकीकृत भएर अघि बढ्न सक्ने नेता रिजालको विश्वास छ । सर्वोच्च अदालतको फैसला र निर्वाचन आयोगको अलमलले नेताहरुलाई पुनः एकपल्ट ठन्डा दिमागले सोच्ने मौका दिएको रिजालको भनाइ छ ।
नेकपाको औपचारिक विभाजन भइनसकेकाले पुनः एकता सम्भव रहेको सङ्केत गर्दै उनले लेखेका छन्, “धेरै बिग्रिए पनि अन्तिम पटाक्षेप हुन बाँकी छ । एकताका लागि आ–आफ्नो ठाउँबाट सोच्ने र योगदान गर्ने समय आएको छ । आवेग, उत्तेजना र अहम् क्षणिक हुन् भने देश, पार्टी र युवा पुस्ताको भविष्य दीर्घकालीन हो ।”
उनले एकता बिथोलिएको देखे–भोगेका नेता कार्यकर्ताले नै भोलिका दिनमा सजगतापूर्वक एकता बचाउन सक्ने भन्दै हारेको सिपाहीले सजगतापूर्वक युद्ध लड्ने तर्क प्रस्तुत गरेका छन् ।