बेनी
फागुन २२
नेपालको कम्युनिष्ट आन्दोलनमा शङ्कर पोखरेल र घनश्याम भूषाल वैचारिक नेताका रुपमा चिनिन्छन् । तत्कालीन नेकपा एमालेमा पोखरेल र भूषालले पार्टीको आन्तरिक जीवनमा वैचारिक घर्षण सिर्जना गरेको देख्ने भोग्ने धेरै छन् । विभाजित नेकपाको ओली र नेपाल खेमामा आबद्ध पोखरेल र भुषालले विवादकै बीचमा पनि एकताको आधार खोज्दै गरेको समाचार बेला आइरहन्छन् ।
विवादका बीचमा पनि संवादमा जुट्न सक्नुलाई यी दुई नेताको खुबीको रुपमा चर्चा गर्ने मान्छे पनि धेरै नै छन् ।
यसैबीच लुम्बिनी प्रदेशका मुख्यमन्त्री एवम् ओली पक्षीय नेता शङ्कर पोखरेलले प्रधानमन्त्री केपी शर्मा ओलीले गरेका कामको बारेमा आफ्नो धारणा सार्वजनिक गरेका छन् । सामाजिक सञ्जाल फेसबुकमार्फत् धारणा सार्वजनिक गर्दै नेता पोखरेलले ओलीले गरेका कामलाई ‘दूरगामी महत्व’को उल्लेख गरेका छन् ।
राम्रो काम गर्दागर्दै पनि ओली घेराबन्दीमा परेको विचार व्यक्त गर्दै नेता पोखरेलले लेखेका छन्, “पार्टी एकता संकटग्रस्त बनेको छ । राष्ट्रिय राजनीति पुनः अस्थिर र अन्योलग्रस्त बनाइँदैछ । सबै पक्ष गम्भीर र जिम्मेवार बनौं।”
पोखरेलका नजरमा प्रधामन्त्रीका रुपमा केपी शर्मा ओलीले गरेका दूरगामी महत्वका कामहरु यस्ता छन्ः
– विश्वास गुमेको अवस्थामा संविधानसभावाट नयाँ संविधानको निर्माण,
– जातीय क्षेत्रीय अतिवाद र विखण्डनवादको वैचारिक रुपमा सामना,
– भारतीय नाकाबन्दीको सामना र सफलता,
– चीननसँगको ऐतिहासिक पारवाहन सम्झौताबाट भविष्यमा नाकाबन्दी नहुने परिस्थितिको निर्माण,
– नेकपा(एमाले) को नेता भएपछि पार्टीको लोकप्रियतामा वृद्धि,
– सफल चुनावी गठबन्धन र ऐतिहासिक पार्टी एकताको नेतृत्व,
– भारत र चीनसँगको सम्बन्धलाई नयाँ आयाम दिने प्रयास,
– अन्तर्राष्ट्रिय स्तरमा नेपालको आवाज सुनिने अवस्थाको सिर्जना,
– सन् १९५०को असमान सन्धीको पुनरावलोकनमा सैद्धान्तिक सहमति,
– पूर्वाधार विकासमा तीव्रता,
– रणनीतिक विकास आयोजनाहरु (रेलमार्ग, जलमार्ग,हवाई यातायात, सुरुङमार्ग, उत्तरदक्षिण करिडोर, खानी अन्वेषण र उत्खननको तयारी आदि) को थालनी,
– सामाजिक सुरक्षामा नयाँ आयाम योगदानमा आधारित सामाजिक सुरक्षा कार्यक्रम,
– विप्लव र सिके राउतसंगको ऐतिहासिक शान्तिवार्ताको नेतृत्व,
– छोटो समयमा नयाँ संविधानको सफल कार्यान्वयन र आम स्विकारोक्तिको निर्माण,
– तराई मधेसको विकासमा तीव्रता,
– प्राविधिक शिक्षामा जोड र विद्यार्थी भर्ना दरमा उल्लेख्य वृद्धि,
– सडक मानवरहित अभियानको नेतृत्व,
– स्वास्थ पूर्वाधार विकासमा क्रान्ति,
– कोभिड १९ महामारीको सफलतापूर्वक सामना आदि।