बेनी
जेठ ३०
म्याग्दीका प्रतिष्ठित व्यापारी एवं समाजसेवी याम शाक्यको निधन भएको छ । कोरोना संक्रमण भएका शाक्यलाई न्युमोनिया देखिएपछि सोही कारण शनिबार धुलिखेल अस्पतालमा निधन भएको हो ।
म्याग्दीको पुरानो व्यापारिक घराना शाक्य परिवारको जेठा छोराका रुपमा याम शाक्य जिल्लामा उद्यमशीलताको विकासको नमुना बनेका थिए । शाक्य भाँडा पसल, भिभा पाउरोटी उद्योग, महारानी बरफ उद्योग, पिएल स्टोर्सलगायतका व्यवसायमार्फत् शाक्यको व्यापारिक क्रियाशीलता रहिआएको थियो ।
स्वर्गीय शाक्यले व्यवसायका साथै जिल्लाको सामाजिक एवं सांस्कृतिक क्षेत्रको विकासमा पनि आफुलाई निरन्तर संलग्न गराउँदै आएका थिए । म्याग्दी बौद्ध संघ, म्याग्दी रेडक्रस, बेनी खानेपानी उपभोक्ता संस्था, महारानी क्षेत्र लगायतका संघसंस्थाको स्थापना, विकासमा शाक्यको निस्वार्थ योगदान रहेको उनीसँग सहकार्य गरेकाहरु सम्झन्छन् ।
आमा लक्ष्मीकुमारी शाक्यको निधन भएको १३औं दिन नपुग्दै र आमाको निधन भएको खबर समेत नपाइकन याम शाक्यले पनि सोही बाटो समातेका छन् ।
स्वर्गीय शाक्यको पार्थिक शरीरलाई आइतबार बिहान बेनीमा अन्त्येष्टि गरिने परिवारजनले जानकारी दिएको छ ।