बेनी
कात्तिक १४
रघुगङ्गा जलविद्द्युत् आयोजनामा कार्यरत कर्मचारीमा कोरोना सङ्क्रमण देखिएपछि गाउँपालिकाका स्थानीय त्रसित बनेका छन् । पछिल्लोपटक तीन जना कर्मचारीमा संक्रमण पुष्टि भएसँगै यस्तो त्रास बढेको हो ।
भारत घर भई हाल रघुगङ्गा हाइड्रोपावरमा कार्यरत ४१, ५० र ५५ वर्षका तीन जना पुरुष सङ्क्रमित पाइएपछि गाउँपालिकाको केन्द्रसमेत रहेका मौवाफाँटका सर्वसाधारण चिन्तित बनेका छन् । यसअघि सोही हाइड्रोमा काम गर्ने एक जना पुरुषमा सङ्क्रमण पुष्टि भैसकेको छ ।
मौवाफाँटका स्थानीय अगुवा मुकुन्द सुवेदीले आयोजनामा कार्यरत भारतीय नागरिकहरु सबैजसो दक्ष कर्मचारी रहेको र तिनको सहयोगीका रुपमा स्थानीय युवाहरु रहेकाले संक्रमणको जोखिम बढेको विचार व्यक्त गरेका छन्।
 |
| फाइल तस्विर |
“आयोजनामा काम गर्ने कर्मचारीमा सङ्क्रमण बढ्नु भनेको स्थानीय युवाहरु पनि जोखिममा पर्नु हो,” सुवेदीले भने, “पिप्लेदेखि दग्नाम हुँदै झिँसम्मका युवाहरु आयोजनामा काम गर्छन् । तिनीहरु जोखिमरहित छन् कि छैनन् भनेर थाहा पाउने केही उपाय छैन ।”
उनका अनुसार आयोजनामा हाल मौवाफाँटका करिव सात आठ जना युवाले काम गरिरहेका छन् । त्यसबाहेक आयोजनाका कर्मचारीहरुले किनमेल गर्ने केही पसलहरु समेत जोखिममा पर्न सक्ने देखिन्छ।
सङ्क्रमित व्यक्तिको सम्पर्कमा रहेकाहरुको स्वाब सङ्कलन गरी परीक्षणका लागि पठाउने चलन छ । तर, रघुगङ्गा हाइड्रोमा कार्यरत ४ जना कर्मचारीलाई सङ्क्रमण पुष्टि हुँदा तिनका सहयोगी वा सम्पर्कमा रहेका कति जनाको स्वाब परीक्षण भएको भन्नेबारे अहिलेसम्म जानकारीमा आएको छैन ।
रघुगङ्गा गाउँपालिकाका अध्यक्ष भवबहादुर भण्डारीले आयोजनालाई बन्दाबन्दीको बेला पनि सञ्चालन गर्ने वातावरण बनाइएको तर, संक्रमण बढ्दै जाँदा के गर्ने भन्नेबारे ठोस निर्णय नभएको जानकारी दिए ।
 |
| फाइल तस्विर |
“रघुगङ्गाको समस्याबारे प्रमुख जिल्ला अधिकारी र कमाण्ड पोष्टका सदस्यलाई जानकारी गराएका छौं,” अध्यक्ष भण्डारीले भने, “हाइड्रोको प्रशासन प्रमुखलाई काम गर्ने कर्मचारीमध्ये कम्तीमा ५० प्रतिशतलाई पिसिआर परीक्षणको व्यवस्था गर्न ताकेता गरिएको छ ।”
भारतीय एक्जिम बैंकको ऋण लगानीमा म्याग्दीमा ४० मेगावाटको रघुगङ्गा जलविद्युत् आयोजना निर्माणाधीन अवस्थामा छ ।