बेनी
असोज २७
नेपाल बाल सङ्गठन, म्याग्दीको अध्यक्षमा युवा व्यवसायी एवं सामाजिक कार्यकर्ता राजेश शाक्य चयन भएका छन् । संघीय सरकार, महिला बालबालिका तथा समाज कल्याण मन्त्रालयले शाक्यलाई म्याग्दीको अध्यक्षमा नियुक्त गरेको हो ।
“फोनमार्फत् जानकारी पाएको छु,” नवनियुक्त अध्यक्ष शाक्यले भने, “औपचारिक पत्र पाएको छैन ।”
 |
| अध्यक्षः शाक्य |
केही दिनअघि मन्त्रालयले विद्या उपाध्याय न्यौपानेको अध्यक्षतामा नेपाल बाल सङ्गठनको केन्द्रमा नयाँ कार्यसमिति गठन गरेको थियो । त्यसक्रममा म्याग्दीमा शाक्यलाई नेतृत्व दिइएको बुझिएको छ । ओली सरकार गठनसँगै गृह मन्त्रालयले नेपाल बाल सङ्गठनको देशभरको सम्पत्ति विवरण सङ्कलन गरेको थियो।
तत्कालीन बडामहारानी रत्न शाहले टुहुरा र असहाय बालबालिकालाई संरक्षण गर्ने उद्देश्यले शुरु गरेको नेपाल बाल सङ्गठन गैरसरकारी संस्थाका रुपमा क्रियाशील छ ।
तत्कालीन जिल्ला पञ्चायत सभापति भेषनाथ शर्माको नेतृत्वमा २०२५ साल असार १९ गते म्याग्दीमा बाल सङ्गठन स्थापना भएको थियो । पञ्चायती व्यवस्था रहँदासम्म पञ्च नेता–कार्यकर्ताको पकड रहेको सङ्गठनमा २०४६ को परिवर्तनपछि कांग्रेस म्याग्दीको हालीमुहाली रहेको थियो ।