बेनी
भदौ ३
पर्वत बेनीमा सुख्खा पहिरो जाँदा एक जनाको मृत्यु भएको छ । जलजला गाउँपालिका–३, पर्वत बेनीस्थित हरि अटो पार्टस माथिको ढिस्को खस्दा म्याग्दीको अन्नपुर्ण गाउँपालिका–८ राम्चेका टेकमान गर्बुजाको घटनास्थलमै मृत्यु भएको पर्वत बेनीस्थित प्रहरी चौकीले जानकारी दिएको छ ।
म्याग्दी र पर्वत जोड्ने कालीगण्डकी नदीको पुलनजिक सञ्चालित रारा अटोमोबाइल्सको ग्यारेजमा गाडी मर्मतका लागि आएका गर्बुजाको मृत्यु र दुई जना मजदुर घाइते भएका हुन् । पहिरो खसेपछि भाग्ने क्रममा घाइते भएका मजदुर राजु ठाकुर र जन्की खानको बेनी अस्पतालमा उपचार भैरहेको र उनीहरुको अवस्था खतरामुक्त रहेको अस्पतालले जनाएको छ ।
पहिरोबाट ग १ ज ६६३२ नम्बरको महिन्द्रा कम्पनीको बोलेरो जीप र ध १ ज ९८६ नम्बरको इको भ्यानमा क्षति पुगेको छ भने ग्यारेज सञ्चालन गरिएको टहरा, गाडी र गाडी मर्मतसम्बन्धी सामग्री पुरिएर क्षति भएको छ ।
बेनी–मालढुङ्गा सडकको स्तरोन्नतिका क्रममा जमिनको भित्तो काटिएको र त्यसमाथि घडेरी बनाउँदा थप भित्तो ताछिएकोले सो ठाउँमा सुख्खा पहिरोको समस्या देखिने गरेको स्थानीयको भनाइ छ ।
