बेनी
साउन २२
कोरोना भाइरसको संक्रमणका कारण ज्यान गुमाउने नेपालीहरुको संख्या १० हजार नाघेको छ । शुक्रबार थप २५ जनाको मृत्यु भएसँगै मृतकको कूल संख्या १० हजार १९ पुगेको छ ।
भाइरस संक्रमणको १४ महीनामा यति धेरै नेपाली नागरिकले ज्यान गुमाएको स्वास्थ्य तथा जनसंख्या मन्त्रालयले जानकारी दिएको छ । नेपालको मृत्युदर १.५ प्रतिशत रहेको मन्त्रालयले उल्लेख गरेको छ ।
कोरोनाले पहिलोपटक २०७७ जेठ ३ गते सिन्धुपाल्चोक, बाह्रबिसेकी २९ वर्षीया सुत्केरीको धुलिखेल अस्पतालमा मृत्यु भएको थियो । जेठ ५ गते एकैदिन २ सय ४६ जनाको मृत्यु भएको थियो ।
स्वास्थ्य मन्त्रालयका प्रवक्ता डा. कृष्ण पौडेलका अनुसार पहिलो लहरमा ६० वर्षभन्दा बढी उमेरका ज्येष्ठ नागरिकले ज्यान गुमाएका थिए भने दोस्रो लहरमा युवाले पनि ज्यान गुमाएका छन् । तथ्याङ्कअनुसार ९ वर्ष तलका ४५ जनाले ज्यान गुमाएका छन् ।
तेस्रो लहरमा बालबालिका बढी संक्रमित हुने सरकारको अनुमान छ । यसको पूर्वतयारीका लागि सरकारले १८० भेन्टिलेटरसहितको २७५ आइसीयू बेड थप्ने प्रक्रिया शुरु गरेको छ ।
सरकारले आगामी ५ महिनामा थप २ लाख संक्रमित थपिने प्रक्षेपण गरेको छ । साथै, असोज १५ गतेको छेकोमा तेस्रो लहर आउन सक्ने अनुमान पनि सरकारको छ । दोस्रो लहर समेत २० प्रतिशतभन्दा तल घट्न सकेको छैन ।
यसैबीच दक्षिण एसियाली मुलुकमा नेपालको मृत्युदर भारत, भुटान, माल्दिभ्स र श्रीलंकाको भन्दा धेरै देखिएको छ।
